Mən sizə müqəddəs bir sevgidən söhbət açacam. O sevgidən ki, sizin ürəklərinizin incə tellərinə toxunacaq və sizi həyatınızın ən unudulmaz illərinə aparacaq. Mənə diqqətlə qulaq asın! Bu hekayəni sizə danışdıqca sanki həyatımın bəzi səhifələrini də vərəqləmiş olacağam. Mən həyatda bir-birini sevən, məhəbbəti yolunda ölümdən belə qorxmayan insanlara çox rast gəlmişəm. Kitablardan oxumuşam, filmlərə baxmışam, həyatına qəsd edənlər haqqında eşitmişəm. Sizə danışacağım hekayənin isə şahidi olmuşam.
Mən sizə Asimanla Səmanın sevgi hekayəsindən danışacam. O sevgidən ki, büllur tək saf, günəş tək hərarətli idi.
